| السبت 02 . 02 . 2008
العلم العراقي
أسعد السواد
هذا علم لوتابوت
ليش الحكومه بسكوت
وين النجم والياقوت
اوين الشعب ظم الصوت
....
فاهي مغندب
مكسور الخاطر واحساسه
ضاع بليل غبار الدنيا
ضيّع كاعه وفاركـ ناسه
ذبحوا نجماته بكمريه
وذلوا عزته ونكسوا راسه
احساس المهظوم بجمريه
واحساس الطاغي يباسه
وين الناس اوين الغيره
كسر راسه بايده وفاسه
خط العلم بريشة ظالم
فرّح روحه وهم جاسوسه
طاحونه الدوله وماترحم
والزينه العلمك محبوسه
بيش اعبرلك ماكو كياش
ضاعت مني حتى الطاسه
بس اعبرلك بالحريه
واكنس راسك بالمكناسه
وادفن علم الدوله الفاهي
وارسم علم بحنه وياسه
وارسم دجله والفرات
وشط العرب واور وساسه
وارسم للعامل مسحاته
جاكوج ومنشار ومعول
قلم وقطاطه وكرّاسه
وارسم زاخو وارسم فاو
وارسم بغداد الاميره
ودياله الحلوه العنجاسه
وارسم بابل ام الدنيا
وارسم آشور وحراسه
كل تاريخ البلد الابيض
مايتشرف بيكم ابدا
انتوا ازباله انتوا انجاسه
|
